ИРИНФО.ru

» » Ирон фæндыры бæрæгбон

Ирон фæндыры бæрæгбон

Хабæрттæ
340
0

Ирон фæндыр… Ирон адæмы царды нæ уыдис, загъгæ, уæд цымæ нæ хъысмæт афтæ бæллиццаг уаид? Æвæццæгæн нæ! Æрдхæрæны рæсугъд зæлты фæрцы раргомгæнæн ис зæрдæйы алæмæтаг æнкъарæнтæ, хуымæтæг дзырдтæй зæгъæн кæмæн нæй, уыцы хъуыдытæ. Фæндырдзагъды аивад Ирыстоны аккаг бынат кæй ахсы, æмæ йын нæ дзыллæ æмбæлгæ аргъ кæй кæнынц, уымæн хорз æвдисæн, — Тæбæхсæуты Балойы номыл ирон академион театры цы фыццаг Æппæтадæмон фестиваль — «Ирон фæндыр» — уыд, уый. Йæ саразыны хъæппæрис разынд РЦИ-Аланийы Культурæйы министрадмæ æмæ Традицион Культурæйы æмæ этнотуризмы республикон центр «Фарн»-мæ. Ирыстоны фæндырдзæгъдджытæй уæлдай ма фестивальмæ хуынд æрцыдысты уазджытæ, курдиатджын музыканттæ Хъæрæсе-Черкестæй, Кæсæг-Балхъарæй, Дагестанæй æмæ æфсымæрон Хуссар Ирыстонæй.


Фестивалы райдайæны РЦИ-Аланийы адæмон артист Бытъæты Роберт аив æмæ зæрдæмæхъаргæ бакаст прозæйæ фыст æмдзæвгæ «Ирон фæндырæн арфæ». Уый фæстæ сценæмæ рахызтысты фестиваль амонджытæ, нæ республикæйы культурæйы сгуыхт кусджытæ Лалыты Хъазыбег æмæ Налдыхъуаты Зæлинæ. Уыдон сценæмæ рахуыдтой РЦИ-Аланийы культурæйы министры хæстæ рæстæгмæ æххæстгæнæг Атайты Мæдинæйы. — Абон мах нæ уарзон музыкалон инструментæн — ирон фæндырæн аразæм фыццаг Æппæтадæмон фестиваль, — загъта йæ арфæйы ныхасы Атайты Мæдинæ. — Йæ саразыны хъуыды æрæфтыд республикон центр «Фарн»-ы коллективмæ. Ацы инструмент нæ адæм æнахуыр æгæрон уарзтæй уарзынц. Уый нæм æнусты тарæй æрхаста фыдæлтыккон музыкæйы зæлтæ. Йæ фæрцы фæлтæрæй-фæлтæрмæ æрхæццæ сты æмæ хъахъхъæд æрцыдысты нæ адæмон сфæлдыстады хæзнатæ. Мах сæрыстырæй ранымайæм нæ курдиатджын фæндырдзæгъдджытæй Дзеранты Венерæйы, Реуазты Симæйы, Мыстулаты Иринæйы æмæ нæ иннæ зындгонд музыкантты нæмттæ. Уадз, хъуысæд Иры зæххæй фæндыры зæлтæ æмæ сæм Иры зæхмæ æмбырд кæнæнт нæ сыхаг республикæтæй курдиатджын музыканттæ. Уый фæстæ райхъуыст музыкалон композици «Ирон бæрæгбон». Ацагъта йæ Культурæйы министрады адæмон инструментты оркестр. Йæ аивадон разамонæг — Уæрæсейы Федерацийы адæмон артист Гæздæнты Булат, дирижер — Цæгат Ирыстоны сгуыхт артисткæ Елхъанаты Светланæ. Фестивалы архайдтой канд фæндырдзæгъдджытæ нæ, фæлæ инструменталон къордтæ æмæ адæмон инструментты оркестртæ дæр. Сæ курдиат дзы равдыстой ног инструменталон къорд «Уарди»-йы уæнгтæ. Кафты паддзахадон ансамбль «Алан»-ы оркестры солисткæ Цъыккаты Светланæ акодта «Хонгæ кафты цагъд». (Кафыд адæмон кафты ансамбль «Сæрмæт»). Æрыгон фæндырдзæгъдæг Уалыты Альберты «Хъазты цагъд»-мæ рæсугъд акафыдысты фольклорон ансамбль «Сатана»-йы хæдахуыр артисттæ. Æрæфы районæй фестивалы архайдтой æмæ сæ курдиат равдыстой æвзонг фæндырдзæгъдджытæ Фидараты Бэллæ, Сосранты Каринæ, Тауытты Витали æмæ адæмон инструментты иугонд оркестр (дирижер Дзоблаты Анатоли). Горæтгæрон районы Сунжæйы хъæуы адæмон кафты ансамбль «Аивад»-ы уæнгтæ сæхи хæдхуыз лæвар ракодтой фестивалы архайджытæн æмæ уазджытæн. Уыдон равдыстой хореографион композици «Ирон кафт фæндыртимæ». Горæтгæрон районæй ма бæрæгбоны архайдтой Октябрыхъæуы Культурæйы галуаны адæмон инструменталон-вокалон къорды уæнгтæ дæр (сæ разамонæг — РЦИ-Аланийы культурæйы сгуыхт кусæг Джихаты Раман). Сæ аив цагъд æмæ хъырндмæ адæмон зарæг «Тар хъæды бæлас» акодта зындгонд зарæггæнæг Хъуысаты Эльвирæ. Дыгуры районы адæмон инструментты иугонд оркестры хæдахуыр артисттæ та ацагътой ирон мелодитæй арæзт алдынбыд (сæ разамонæг Цопанты Ислам). Курдиатджын æрыгон фæндырдзæгъдджыты дуэт Тедеты Азæмæт æмæ Джыккайты Дианæ (Октябрыхъæуы музыкалон скъола) ацагъта цалдæр ирон рагон мелодийы. Æнæсæрæндæр нæ уыд Дзæуджыхъæуы аивæдты колледжы ахуыргæнинаг Сæлбиты Лянæ. Уый акодта «Хонгæ кафт»-ы цагъд. Зындгонд композитортæ Æлборты Феликсы æмæ Гæздæнты Булаты аив мелодитæй фестивалы уæвæг дзыллæты зæрдæтæ барухс кодтой фæндырдзæгъдджыты квинтет «Алмат» (Кировы район) Алагиры кад та фестивалы хъахъхъæдтой фæндырдзæгъдджыты трио «Ирыстоны фидæн». Суанг хæрз сабийæ фæндырдзагъды аивадмæ йæ хъус дары курдиатджын суинаг музыкант, Культурæйы министрады музыкалон скъолайы ахуыргæнинаг Томайты Алыксандр. Уый дæр аивадуарзджыты размæ рахаста йæ хæдхуыз æрмдзæф. Аивадон бæрæгбоны æппæты хистæр фæндырдзæгъдæг уыд Алидзаты Мæдинæт. Уый сценæмæ куы рацыд, уæд ын залы бадæг адæм лæугæйæ сарæзтой тыхджын къухæмдзæгъд. Райста фæндыр йæ куыствæллад къухтæм æмæ ацагъта цалдæр ирон рагон цагъды. Адæм ын ахæм æгъдау кæй радтой, уый тыххæй сын зæрдиагæй арфæ ракодта. Загъта, ахæм бæрæгбæттæ Ирыстоны фидæн рæсугъддæр кæй кæнынц. Æппæты æвзонгдæр архайæг та уыд Джиоты Иван. Уый æрмдзæфыл уæлдай æхсызгондæрæй сæмбæлдысты фестивалы уæвджытæ æмæ йын сарæзтой тыхджын къухæмдзæгъд. Иудадзыгдæр нæ республикæйы аивадон бæрæгбæтты æмæ конкурсты разæнгардæй фæархайы Фæсивæды сфæлдыстады рæзты центр «Сæуæхсид»-ы ирон адæмон инструментты къорд «Уадындз» (сæ разамонæг — Цæгат Ирыстоны адæмон артисткæ Агънаты Земæ). Фестивалы уæвджыты размæ рахастой ног уацмыстæ. Æхсызгон уыд Дзæуджыхъæуы Гергиты Валерийы номыл аивæдты колледжы цы фæндырдзæгъдджыты трио «Ариант» сæ курдиаты азæлдæй зæрдæты ног æхсызгон æнкъарæнтæ кæй райгуырын кодта, уый. Адæм зæрдиагæй сæмбæлдысты хуссарирыстойнаг фæндырдзæгъдæг Ходы Арсеныл. Хъæрæсе-Черкестæй фестивальмæ ссыд ацы республикæйы сгуыхт артист Ислам Салпагаров, æмæ арæхстджынæй ацагъта цалдæр хъæрæсейаг цагъды. Фестивалы архайдтой курдиатджын фæндырдзæгъдæг Рами Дорокка Кæсæг-Балхъарæй æмæ ацы республикæйы адæмон инструменталон-вокалон ансамбль «Уаридадада». Фæндыры бæрæгбоны йæ курдиат арæхстджынæй равдыста дагестайнаг æрыгон фæндырдзæгъдæг Урузбег Алиев. Аивадуарзджыты размæ рахаста цалдæр национ мелодийы, йæхæдæг сыл бакуыста, афтæмæй. Фæндырдзæгъдджыты фыццаг Æппæтадæмон фестиваль «Ирон фæндыр»-æн та ахæм хæрзгæнджытæ басгуыхтысты ООО «Фæндыр» (йæ сæргълæууæг — Узегаты Тамерлан) æмæ ресторан «Фермер» (Йæ хицау — Хъæцмæзты Станислав). Ацы кустуæтты сæргълæуджытæн лæвæрд æрцыд РЦИ-Аланийы Культурæйы министрады арфæйы фыстæджытæ. Фестивалы архайджытæ та се ‘ппæт дæр Традицион культурæ æмæ этнотуризмы республикон центр «Фарн»-ы директор, РЦИ-Аланийы аивæдты сгуыхт архайæг Цæриаты Валерийы къухæй райстой дипломтæ æмæ зæрдылдарæн лæвæрттæ. Ирон фæндыры бæрæгбоны кæронбæттæны 80 æвзонг фæндырдзæгъдæджы кæм цагътой, ахæм иугонд ансамбль акодта «Хонгæ кафт»-ы цагъд. Ирон театры фойейы та фенæн уыд национ уæлæдарæсы æмæ, æрмдæснытæ кæй сарæзтой, ахæм музыкалон инструментты равдыст.


ГАСАНТЫ Валери


Запись Ирон фæндыры бæрæгбон впервые появилась РÆСТДЗИНАД.

Социальные комментарии Cackle
Уважаемый посетитель, Вы зашли на сайт как незарегистрированный пользователь. Мы рекомендуем Вам зарегистрироваться либо зайти на сайт под своим именем.