ИРИНФО.ru

» » 50-аздзыд скъола

50-аздзыд скъола

Газета Растдзинад
203
0

Куыд тагъд тæхы рæстæг! Æнусы ‘рдæг рацыд, Суададжы хъæуы астæуккаг скъола йæ дуæрттæ куы байгом кодта, фыццаг хъæлдзæг дзæнгæрæг сабиты ахуыры бæрзæндтæм куы фæхуыдта, уæдæй абонмæ. Йæ фыццаг директор уыд ДЗОДЗЫККАТЫ Ислам. Сæдæгай чызджытæ æмæ лæппутæ, фарны хъуыддæгтæ чи аразы, ахæм фæлтæртæ схъомыл кодта хъæууон скъола. Йæ тыргътæ дзурын куы зониккой, уæд цас æхсызгон, хъæлдзæг хабæрттæ радзуриккой. Кæрæдзи фенынмæ, æрыгон бонтæ æрымысынмæ, сæ уарзон скъолайы 50 азы юбилей сбæрæг кæнынмæ æрæмбырд сты алы азты рауагъдонтæ.


img_2084— Мах ног скъолайы фыццагкъласонтæ уыдыстæм. 1966 азы нæ фыццаг ахуыргæнæг Гуытъиаты Серафимæимæ æрбакъахдзæф кодтам, — зæгъы Зæнджиаты Тамарæ. — Фæстæдæр нæ царды раст фæндагыл æвæрдтой ирон æвзаджы ахуыргæнæг Лианты Розæ, уырыссаг æвзаджы уроктæ та нын лæвæрдта Дарчиты Венерæ, математикæйы ахуыргæнæг нын уыд Дудиаты Валентинæ. Мæ фидæны дæсныйад мын бауарзын кодта Хуытыгаты-Самоненко Антонинæ. Уый хуызæн æз дæр сахуыр кодтон фæсарæйнаг æвзæгты ахуыргæнæгыл. Бузныг се ‘ппæтæн дæр. Къæлхидты Алеш (Алексей) ацы скъола 1971 азы каст фæцис. Йæ цардвæндаг æй фæхуыдта ахуыры æмæ фæллойы фæдыл Уæрæсейы алы рæттæм. Фæлæ йæ райгуырæн хъæу, йæ уарзон скъола йæ зæрдæйæ нæ цух кодтой. — Ахуыргæнæг нæм дзуары хуызæн каст. Домаг уыдысты, фæндыд сæ, цæмæй нæ аккаг лæппутæ æмæ чызджытæ рауайа, фæсурокты дæр куыстой немæ. Сæ фыдæбон арфæйаг рауад, зæгъы Алеш. Хæдарцаты Махары ном зындгонд у, куыд дыууæ хатты Олимпаг чемпион, Паддзахадон Думæйы депутат, абон та у нæ республикæйы сæйраг горæты администрацийы разамонæг.


— Æз кæмдæриддæр сæрыстырæй фæзæгъын, Суададжы скъола каст кæй фæдæн, хъæуккаг лæппу кæй дæн. 35 азы размæ мæ афæндараст кодта скъола царды уæрæх фæндагмæ. Бирæ мысинæгтæ мын ис, мæ ахуыргæнджытимæ, ме ‘мкъласонтимæ баст чи сты, ахæмтæ, — зæгъы Махар. Мæ бон сын баххуыс кæнын уæд, æндæр иуварс никуы æрлæууыдтæн, уый ме стыр хæсыл нымайын. Йæ равзæрдæй абонмæ скъолайы бирæ ивддзинæдтæ æрцыд, фæзынд ног программæтæ, ног ифтонггарз, домæнтæ дæр æндæр сты, фæлæ йæ сæйраг нысан уыд æмæ уыдзæн — нæ бæстæйæн аккаг гражданинтæ æмæ патриоттæ хъомыл кæнын. Дард Магаданæй, йæ уарзон скъолайы юбилеймæ ссыд Къæлхидты Хъазыбег. Йæ æнкъарæнтæ не ‘мбæхсгæйæ, Хъазыбег зæгъы: — Адæймаг цас фылдæр цæры, фылдæр зоны, уыйбæрц йæ зæрдæ хæстæгдæр кæны йæ уидæгтæм, йæ сабидуджы сыгъзæрин бонтæм. Нæй ферох кæнæн нæ фыццаг ахуыргæнæг Хуыриаты Заирæйы æмæ иннæты. Æрмæст зонындзинæдтæ нын нæ лæвæрдтой нæ ахуыргæнджытæ, фæлæ нын амыдтой царды уроктæ дæр. Уарзтой æмæ нæ рæвдыдтой. Хъазыбег каст фæцис Хæххон-металлургон институты хæххон-геологон факультет. Йæ хъысмæт æй фæхуыдта Ирыстонæй дард ранмæ, у амалхъом адæймаг, егъау æрзæткъахæнты хицау. Алывæрсыг æххуыс кæны йæ хъæубæстæн, уый тыххæй бирæ арфæйы ныхæстæ фехъусы. Брытъиаты Зæринæ, æрыгон журналист: — Алы адæймагæн дæр йæ царды ис уарзон ахуыргæнæг, йæ ныхасæй, йæ хъуыддæгтæй фæзминаг чи у, дæ сабибонты дын ныфс чи уыдис, ныййарæджы рæвдыд кæмæй зыдтай, ахæм æнæферохгæнгæ адæймаг, — загъта Зæринæ. — Нæ ахуыргæнджытæ се ‘ппæт дæр архайдтой, цæмæй зонæм кафын дæр, зарын дæр, хæрзарæхст уæм алцæмæ дæр, ахуыр нæ кодтой уæздандзинадыл æмæ æфсармыл. Уыцы миниуджытæ мæ иууылдæр царды бахъуыдысты.


— Кадджын у не скъола, мах та йын йæ кад ноджы бæрзонддæр хæсдзыстæм, — зæгъынц иуæндæсæмкъласонтæ Айларты Аслан æмæ Фæрниаты Батрадз. Ахуырмæ, аивадмæ æмæ спортмæ зæрдæргъæвд лæппутæ арфæ кæнынц скъолайы ахуыргæнджытæн. Фæнды сæ, цæмæй фидæны фæлтæртæн ноджы хуыздæр уой сæ уавæртæ, цæмæй ног стъолтæ, бандæттæ фæзына скъолайы, сæ спортивон зал цалцæггонд æрцæуа æмæ æндæртæ. Асланы фæнды хорз финансист суæвын, Батрадзы та — дæсны актер. Сæ рæсугъд бæллицтæ сæ къухы бафтæнт. Бæрæгбон йæ тыхы бацыд. Æхсызгонæй сæмбæлд йæ хъæбултыл скъола. Бæрæгбонхуыз уыд йæ алы къуым дæр. Алы кары адæм кæрæдзийæн цинтæ, хъæбыстæ кодтой. Æхсызгонæй æрзылдысты скъолайы æртæ уæладзыгыл, партæты уæлхъус абадтысты. Хъæлдзæг дзæнгарæг сæ фæхуыдта хъæуы культурæйы хæдзармæ. Йæ залы адæмæй къух бакæнæн нал уыд. Бирæ рæсугъд арфæтæ райхъуыст сценæйæ. Хъæубæсты буц хистæр Фæрниаты Эльбрус бузныг загъта бæрæгбон саразджытæн, фæсивæдæн бафæдзæхста, цæмæй ахуырмæ, фæллоймæ æнæзивæгæй цæуой. Хæдарцаты Махар йæ арфæтимæ йæ уарзон скъолайæн балæвар кодта æртæ ноутбучы æмæ æртæ проекторы экрантимæ. 50-аздзыд скъолайы абон ахуыр кæны 105 ахуырдзауы. Педагогон коллективæн дæсны разамынд дæтты Козаты Зауырбег.


— Нæ ахуырдзауты ‘хсæн ис бирæ курдиатджын сывæллæттæ. Хорз ахуырæн сын ис æппæт гæнæнтæ. 50 азмæ бирæ æнтыстдзинæдтæ бафтыд не скъолайы къухы, фæлæ сæйрагдæр æнтыстыл нымайæм, нæ бæстæйæн патриоттæ хъомыл кæнын. Цæмæй арæхдæр хъусæм — мæнæ ацы дзæбæх чызг, кæнæ ацы сæрæн лæппу Суададжы скъолайы рауагъдонтæ сты, зæгъгæ. Уæд сæрыстыр уыдзыстæм иууылдæр. Фæндараст у дарддæр дæр, скъола! Дæ фæндаг рæсугъд æмæ арфæйаг уæд! ЦÆГÆРАТЫ Жаннæ

Социальные комментарии Cackle
Уважаемый посетитель, Вы зашли на сайт как незарегистрированный пользователь. Мы рекомендуем Вам зарегистрироваться либо зайти на сайт под своим именем.