ИРИНФО.ru

» » Ирон зарæджы бæрæгбон

Ирон зарæджы бæрæгбон

Газета Растдзинад
291
0

Ирон зарæг… Цæй диссаг дæ, æвæдза! Ды адæймагыл тыхст сахат ныфсы базыртæ садзыс. Йæ цины сахат та йын йæ æхсызгондзинад фæдывæр кæныс. Дæ алæмæты рæсугъд зæлтæм æхсæрдзæнты зæлланг тынгдæр фæхъуысы, дидинæг ракалынц нæудзар быдыртæ æмæ фæзтæ.


Ирон эстрадон зарæджы аивадæн бындур чи æрæвæрдта, уыдон уыдысты зындгонд артисттæ, композитортæ æмæ зарæггæнджытæ Баллаты Валодя, Суанты Ким, Галаты Барис, Саггаты Валери, Кокайты Барис æмæ нæ иннæ аивады дæснытæ. Цæмæй сæ удварны бæркады рухс, аивады фыццаг къахдзæфтæ чи кæны, уыцы фæсивæды базырджын кæна, уыцы нысанимæ РЦИ-Аланийы Культурæйы министрад æмæ традицион культурæйы æмæ этнотуризмы республикон центр «Фарн» сарæзтой ирон эстрадон зарæджы республикон конкурс-фестиваль «Зараг Алани». Мæйы дæргъы конкурсы æвзарæн туртæ цыдысты Цæгат Ирыстоны районты. æмæ дзы цы æрыгон, суинаг фæсивæд архайдта, йæ вокалон курдиат дзы чи равдыста, уыдоны арæхстдзинадæн аргъ кодтой жюрийы уæнгтæ Традицион культурæйы æмæ этнотуризмы республикон центр «Фарн»-ы директор, РЦИ-Аланийы аивæдты сгуыхт архайæг Цæриаты Валери (уыд жюрийы сæрдар), РЦИ-Аланийы ахуырады сгуыхт кусæг, хормейстер Мамыкъаты Людмилæ, зындгонд композитор, РЦИ-Аланийы аивæдты сгуыхт архайæг Кокайты Барис, РЦИ-Аланийы адæмон артист, зарæггæнæг Дауыраты Эдуард, поэт, фыссæг, драматург, тæлмацгæнæг, Хетæгкаты Къостайы номыл паддзахадон премийы лауреат Кокайты Тотрадз, композитор Тедеты Саликъо. Республикон конкурсфестиваль «Зараг Алани»-йы кæронбæттæн галаконцерт æрæджы уыд Дзæуджыхъæуы Евгений Вахтанговы номыл уырыссаг академион театры. Йæ райдайæны конкурсы æмæ уазджытæн зæрдиаг арфæ ракодта РЦИ-Аланийы культурæйы министр Сихъоты Тимур.


— Абон у ирон зарæджы стыр бæрæгбон. Йæ архайджытæн мæ зæрдæ зæгъы аивады бæрзонд къæпхæнтæм куыд хизой, сæ уæлахизтæн, се ‘нтыстытæн мах та хорз æвдисæн куыд уæм, дунейы фарн уый зæгъæд. Ацы рæсугъд бæрæгбон саразыныл чидæриддæр бацархайдта, уыдонæн дæр зæгъын бузныг. Не ‘рвылбоны цард цин æмæ зарæгвæлыст уæд, — загъта Сихъоты Тимур. Уый фæстæ сæ вокалон курдиат æмæ рæсугъд аивад æвдыстой конкурсы хуыздæр архайджытæ. Уыдон зарыдысты куыд ирон адæмон, афтæ нæ зындгонд композиторты фыст зарджытæ. Алчидæр сæ йæ рацыдæй æмæ зардæй æвдыста уæздандзинад æмæ фыдæлтыккон ирон æгъдау. Чызгæй, лæппуйæ алчидæр сæ йæ зарæджы æвæрдта рæсугъд фæлгонцтæ, алкæмæн дæр сæ бантыст ирон зарæджы арф хъуыды бамбарын æмæ йæ аивæй адæмы размæ рахæссын. Фестиваль-конкурсы уыд кадджын уазджытæ дæр. Сæ курдиатæй йæ архайджыты æмæ аивадуарзджыты зæрдæтæ барухс кодтой Республикæ Хуссар Ирыстоны сгуыхт артист Бекъойты Вано, РЦИ-Аланийы адæмон артист Харебаты Вадим, æрыгон зарæггæнæг Томайты Миланæ, Беслæны Культурæйы галуаны вокалон къорды уæнгтæ, стæй зарæггæнджытæ Туаты Тугъан æмæ Дзæрæгъæсты Аланæ. Конкурсы архайджытæ сæ вокалон арæхстдзинад æвдыст куы фесты, уæд Цæриаты Валери се ‘ппæт архайджыты рахуыдта сценæмæ. Хæрзиуджытæ дæттыны размæ уал йæ раныхасы куыд загъта, афтæмæй ацы аивадон конкурсы нысан у ирон эстрадон зарæджы æцæг аивадимæ кæстæрты зонгæ æмæ йын йæ хæзнатæ се ‘хсæн парахат кæнын. Фæнды нæ, зæгъы, цæмæй ацы конкурс суа æрвылазон. Жюрийы хатдзæгтæм гæсгæ, конкурсы дипломанттæ систы æртындæс архайæджы. Фестивалы æппæты кæстæр архайджытæ


— Гутнаты Мæирбег æмæ Богазты Викторияйæн саккаг кодтой дипломтæ æмæ æхцайы премитæ. Хорз хъуыддаг иунæгæй аразын æнцон нæу, æмæ ацы æркаст саразджыты фарсмæ æрбалæууыдысты республикон æхсæнадон змæлд «Иудзинад»-ы уæнгтæ. Сæ номæй конкурсы архайджытæн арфæ ракодта Мæрзойты Тамерлан. Конкурсы архайджытæй æхсæнад «Иудзинад»-ы номæй æхцайы премитæ лæвæрд æрцыд Дзытиаты Алинæйæн, Зинæ Квагенидзейæн, Медойты Асланæн (уый ма сси конкурсы æртыккаг къæпхæны дипломы аккаг дæр), Хадыхъаты Аланæйæн. Æртыккаг къæпхæны дипломтæ ма радтой Текъойты Мелания æмæ Дзидзойты Нельмæйæн. Дыккаг къæпхæны дипломтæ, лæвæрттæ æмæ æхцайы премитæ саккаг кодтой Барахъты Аделинæйæн, Мæхъиты Батрадзæн æмæ Мæргъиты Иринæйæн. Дзæуджыхъæуы, Гергиты Валерийы номыл аивæдты колледжы вокалон хайады фыццаг курсы студент Хъуысаты Сосланæн радтой фыццаг къæпхæны диплом, зынаргъ лæвар æмæ æхцайы преми. Конкурс цæмæй æмбæлгæ уагыл ацыдаид, ууыл зæрдиагæй бацархайдтой Традицион культурæйы æмæ этнотуризмы республикон центр «Фарн»-ы директор Цæриаты Валери, хайады сæргълæууæг Битарты Ларисæ. Конкурсы кæронбæттæн концерты амонджытæ уыдысты РЦИ-Аланийы культурæйы сгуыхт кусджытæ Налдыхъуаты Зæлинæ æмæ Лалыты Хъазыбег. Цард нын кæд нæ размæ цæлхдуртæ æвæры, фæлæ сын нæ адæм кæй фæразынц, сыгъдæг, æцæг аивадыл сæхи кæй нæ тигъ кæнынц, стæй нæм бирæ хорз, курдиатджын фæсивæд кæй ис, уый ирдæй рабæрæг ацы конкурсы.


ГАСАНТЫ Валери

Социальные комментарии Cackle
Уважаемый посетитель, Вы зашли на сайт как незарегистрированный пользователь. Мы рекомендуем Вам зарегистрироваться либо зайти на сайт под своим именем.